Fara e zezë, nga kultivimi i fermerëve vendas tek prodhimi i vajit, përdorimet dhe sëmundjet që shëron
Fara e zezë është përdorur prej shekujsh si një trajtim natyral kundër një sërë problemesh shëndetësore.
Duke qenë se përmban acide yndyrore, vitamina dhe substanca të tjera të domosdoshme për organizmin, fara e zezë ka fuqi të mëdha kurative.
Megjithëse në vende të ndryshme të botës përdorimi i saj është i mirënjohur, në vendin tonë kjo bimë njihet shumë pak.
Por në cilat sëmundje kjo farë ka efikasitet shërues dhe si duhet përdorur ajo, doza dhe gërshetimi e kombinimi me produkte të tjera?
Në rubrikën ”Bima dhe Shëndeti” në “Rreze Dielli” në Report Tv, specialisti i bimëve mjekësore tregon përdorimet e farës së zezë, efektet e saj magjike në organizëm si dhe sëmundjet që shëron.
“Fara e zezë, shëruesja e madhe që dhuron shëndet” thekson Merja në fillim të bisedës duke vijuar me veçoritë botanike të kësaj bime të mrekullueshme për shëndetin tonë.
“Fara e zezë pëlqen tokat ku rritet gruri, toka gëlqerore. Rritet në lartësinë 40-60 cm, ka kërcell të lëmuar, gjethe të ndara si shirita, ndërsa lulet janë ngjyrë qielli në të bardhë. Ka 5 petale e shumë nënpetale, thekë dhe pistil. Lulëzon në muajin maj, ndërsa frutifikon dhe piqet në qershor-korrik. Frutat janë kapsula me nga 3-7 folikula të bashkuara. Mbillet në rreshta 24 cm larg njëra-tjetrës, një dynym do 2-2.2 kg fara dhe rendimenti shkon 80-100 kg/dynym” thekson Merja, duke treguar se kjo farë dikur nuk njihej fare nga fermerët vendas, madje shpesh hidhej pa i kushtuar rëndësi, ndërsa sot kjo farë ka shumë kërkesa për prodhim dhe përdorim.
“Përbërësit kimikë të farës së zezë si Omega 3, Omega 6, vitamina A, B1, B2, B6, C dhe E dhe shumë përbërës biokimik me veti antioksiduese, antimykotike, antibakteriale, antikancerogjene si dhe aminoacide, bëjnë që fara e zezë sot të quhet ndryshe dhe ‘fara me efekte magjike’, pasi është fuqizuese në funksionin e organeve të brendshme, ndërsa prezenca e acidit stearik dhe linoleik, ndikon në frenimin e plakjes së organizmit” tregon Merja duke theksuar se përdorimi i farës së zezë bën me të vërtetë një mrekulli në organizëm, pasi çtoksifikon të gjitha organet e brendshme, i pastron dhe kjo bën që çdo organ të funksionojë në mënyrë perfekte “Po funksionojë çdo organ mirë, sëmundja nuk ka vend në trupin e njeriut” nënvizon Ylli Merja.
Dozat e përdorimit të farës së zezë, ashtu si dhe për çdo bimë apo produkt tjetër, janë shumë të rëndësishme, ndaj duhet të jemi të kujdesshëm.
“Të rriturit konsumojnë 1 lugë supe në ditë më fara të coptuara. Vaj 2-3 lugë çaji në ditë pihen 10-15 minuta para buke. Ndërsa fëmijët në varësi nga mosha nga 1/3 deri 1/2 e dozës së të rriturve” thotë specialisti Merja.
Por në cilat sëmundje Fara e zezë ka efikasitet shërues dhe si duhet përdorur ajo, gërshetuar e kombinuar me produkte të tjera, Ylli Merja rekomandon:
– Si përbërës i ushqimit të mëngjesit një lugë supe me fara në kos
– Për problemet e mushkërive: Mjaltë, farë e zezë 200 gr, xhinxhër 100 gr, jamball 10 gr. Përzieni sa të shkojnë 630 ml. Konsumohet 2×1 lugë supe në ditë
– Për dhimbje koke, migrenë: Pini 3 x 1 lugë çaji në ditë, lyeni qafën dhe skalpin e kokës 1 herë në ditë
– Për rënie floku lyejeni skalpin 2-3 herë në javë
– Për bronkit, virozë, kollë: Në 1 lugë supe vaj fare të zezë shtoni 6-8 pika vaj dafine dhe lyeni kafazin e kraharorit 1 herë në ditë. Pini 3×1 lugë çaji në ditë 15 minuta para buke
– Për normalizimin e tensionit: Pini 2 x 1 gotë uji me 1 lugë gjelle uthull molle dhe 1 lugë çaji me vaj fare të zezë
– Për lëkurën e ashpërsuar dhe puçrra në fytyrë: Në 1 lugë supe me vaj fare të zezë shtoni 6-8 pika vaj livando
– Për largimin e acidit urik pihen 2 x 1 lugë çaji në ditë
– Për ndalimin e të vjellave apo për përmirësimin e oreksit pini çaj nenexhiku 2-3 gota në ditë dhe 2 x 1 lugë çaji farë e zezë vaj
– Për dhimbjet reumatizmale: Vendosim në kyçet që dhembin kompresa me uthull molle. I lëmë 10-15 minuta, pasi heqim kompresën lyejmë kyçet me 1 lugë gjelle vaj fare të zezë dhe 5 pika vaj rigoni dhe 5 pika vaj dafine
– Për vitiligo: Përzieni 10 ml uthull molle dhe 1 tetraciklinë. Lyejmë vatrat me vitiligo, pasi thahen vendosim 10 ml vaj fare të zezë dhe 5 pika vaj rigoni dhe 5 pika vaj livando
– Për acarimet gjinekologjike: Shpëlajmë zonën e irrituar me çaj kamomili dhe rigoni. Lyeni zonën me vaj fare të zezë, 5 pika vaj rigoni dhe 5 pika vaj liri
– Për diabetikët, të konsumojnë 1 lugë supe në ditë me fara të zeza të bluara
– Për anemikët, gjithashtu të konsumojnë 1 lugë supe në ditë fara të bluara
– Për potencën mashkullore: 100 gr farë e zezë, 100 gr arra, 2 cc esencë konopice, 100 gr fara chia dhe mjaltë sa të mbushet kavanozi 600 ml.
