Një avion i linjës Delta Airlines nga Salt Lake City drejt Amsterdamit është shndërruar në një skenë paniku, pasi avioni pësoi një rënie të papritur prej 460 metrash për vetëm 85 sekonda, për shkak të turbulencave ekstreme.
Ngjarja ndodhi rreth dy orë pas nisjes, ndërsa avioni ndodhej në ajër mbi SHBA. Si pasojë e incidentit, të paktën 25 persona u plagosën dhe fluturimi u devijua për një ulje emergjente në aeroportin ndërkombëtar të Minneapolis/St. Paul, rreth orës 17:30 të mbrëmjes së mërkurë.
Sipas dëshmitarëve, turbulencat ishin aq të forta sa pasagjerët dhe karrocat me ushqime u hodhën në ajër, duke përplasur gjithçka brenda kabinës. Disa stjuardesa u rrëzuan. Foto nga kabina tregojnë ushqim dhe pije të shpërndara gjithandej.
“Njerëzit që nuk kishin rripin e sigurimit, u përplasën me tavanin,” tregoi LeeAnn Clement-Nash për ABC Neës. “Ishte e tmerrshme. Disa njerëz ranë mbi të tjerët. Dëgjova për raste me brinjë të thyera dhe këmbë të thyer.”
Përveç pasagjerëve, edhe disa anëtarë të ekuipazhit ishin mes të plagosurve. Të gjithë të lënduarit u transportuan në spital pas uljes së avionit. Në bord ndodheshin 275 pasagjerë dhe 13 anëtarë ekuipazhi.
