Momente frike dhe paniku janë regjistruar në qytetet e Elbasanit dhe të Durrësit, pasi një tërmet është ndier mbrëmjen e sotme edhe në disa zona të tjera përreth.
Banorët kanë raportuar se lëkundjet sizmike janë ndjerë për disa sekonda, duke bërë që shumë qytetarë të dalin jashtë banesave dhe ambienteve ku ndodheshin në ato momente.
Sipas të dhënave paraprake, tërmeti ka pasur magnitudë rreth 4.0 të shkallës Rihter. Epiqendra dyshohet të ketë qenë pranë zonës së Peqinit, ndërsa thellësia e tij është raportuar rreth 5 kilometra.
Lëkundjet janë ndier jo vetëm në Elbasan dhe Durrës, por edhe në disa qyteza dhe fshatra përreth, si dhe në zona të tjera të Shqipërisë së mesme.
Fatmirësisht, deri tani nuk raportohen dëme materiale apo persona të lënduar. Sipas raportimeve të para nga korrespondentët në terren dhe autoritetet lokale, situata paraqitet e qetë, ndërsa strukturat përgjegjëse vijojnë monitorimin për çdo zhvillim të mundshëm pas lëkundjeve sizmike.
