Pas disa ditësh heshtjeje që ndoqi daljen e tij nga shtëpia e Big Brother VIP Kosova, Eduart Kuçi ka bërë reagimin e tij të parë publik. Ish-banori u largua nga loja pas një televotimi, ku vendimi përfundimtar u la në duart e publikut.
Ndryshe nga shumica e banorëve të tjerë që reagojnë menjëherë pas eliminimit, Kuçi kishte zgjedhur të qëndronte larg vëmendjes mediatike, duke mbajtur një heshtje që ngjalli kuriozitet te ndjekësit. Fansat prisnin me interes çdo shenjë të tij, duke shpresuar për një prononcim lidhur me përvojën në shtëpi, dinamikat me banorët e tjerë dhe mënyrën se si u përjetua largimi.
Përmes një postimi në Instagram, Kuçi paralajmëroi se do të flasë publikisht mbrëmjen e nesërme:
“Nesër. 20:00. Kam me thënë diçka. Ka qenë koha me hesht. Tash është koha me fol.”
Ky mesazh i shkurtër, por i domethënës, ka rritur pritshmëritë dhe pikëpyetjet për përmbajtjen e reagimit të tij. Publiku spekulon nëse fjalët e Kuçit do të lidhen me lojën, marrëdhëniet brenda shtëpisë apo me situata të pakomentuara më parë gjatë qëndrimit të tij në BBVK. Reagimi i tij pritet të japë një pasqyrë më të qartë të përvojës dhe mendimeve të ish-banorit, duke vendosur kështu një pikëpyetje të re në rrjedhën e këtij sezoni.
