Sophie Kinsella, autorja e serisë së njohur të romaneve “Shopaholic” vdiq në moshën 55-vjeçe, njoftuan familjarë të saj.
Shkrimtarja, e cila më 12 dhjetor do të mbushte 56 vjeçe, ishte e sëmurë prej kohësh.
“Ndonëse vuante nga një sëmundje që e përballoi me një guxim të paimagjinueshëm, Sophie ndihej me fat që kishte një familje dhe miq kaq të mrekullueshëm dhe që pati suksesin e jashtëzakonshëm të karrierës së saj si shkrimtare. Ajo nuk e merrte asgjë si të mirëqenë dhe mbeti gjithmonë mirënjohëse për dashurinë që mori”, shkruajnë familjarët në një postim.
Pas fillimeve në gazetari, në vitin 2000 ajo arriti suksesin e parë ndërkombëtar me botimin e “The Secret Dreamworld of a Shopaholic”, që në italisht u publikua me titullin “I Love Shopping”.
Saga përfshin nëntë romane dhe një ebook.
Në vitin 2009 doli në kinema filmi “I Love Shopping”, i bazuar në dy librat e parë të serisë, me Isla Fisher në rolin kryesor.
Kinsella ishte e sëmurë prej kohësh.
Në prill 2024 ajo bëri publike në rrjetet sociale se vuante nga një tumor në tru, dhe më pas rrëfeu historinë e diagnozës dhe të procesit të të mësuarit për të jetuar dhe dashur sërish, në romanin e saj të shkurtër “Cosa si prova”.
Protagonistja është Eve, një shkrimtare e njohur, e cila zgjohet në një shtrat spitali pa kujtuar se si ka përfunduar aty.
Bashkëshorti, që i rri pranë vazhdimisht, i shpjegon se i është nënshtruar një operacioni për heqjen e një tumori të madh malinj në tru.
“Libri im më autobiografik. Historia e Eve është historia ime”, kishte thënë Sophie Kinsella.
Romani, prekës dhe optimist, flet për vlerën e jetës.
Ndërsa mëson sërish të ecë, të flasë dhe të shkruajë, Eve duhet të përballet me diagnozën dhe me sfidën për t’u shpjeguar fëmijëve çfarë po ndodh.
Ajo nis të rikujtojë atë që ka rëndësi të vërtetë për të, ecjet e gjata dorë për dore me bashkëshortin, mbrëmjet e kaluara duke luajtur me familjen dhe dëshirën për të mos hequr dorë kurrë nga blerja e fustanit që i pëlqen.
