Kinematografia spanjolle është në zi pas ndarjes nga jeta të aktores së njohur Verónica Echegui, e cila ndërroi jetë të dielën në një spital të Madridit, në moshën 42-vjeçare.
Mediat lokale raportojnë se ajo po luftonte në heshtje me kancerin, një diagnozë që u mbajt private nga ekipi dhe familja e saj.
Echegui, e lindur në Madrid më 1983, kishte mbi 30 role në filma dhe seriale, duke u bërë një nga figurat më të rëndësishme të kinemasë spanjolle në dy dekadat e fundit. Ajo fitoi famë me rolin kryesor në filmin “Yo soy la Juani” (2006), që i solli një nominim për çmimin Goya si Aktorja e Re më e Mirë.
Karriera e saj përfshinte role të spikatura si në filmin “My Prisoner’s Yard” (2008), në “The Cold Light of Day” (2012) përkrah Sigourney Weaver dhe Bruce Willis, si dhe në projektet ndërkombëtare “Fortitude” (2015–2017), “Book of Love”, “Explota Explota” (2020) dhe “Objetos” (2022). Roli i saj i fundit ishte në serialin e Apple TV+ “Love You To Death”, i publikuar këtë vit.
Lajmi ka tronditur botën e artit dhe fansat e saj. Kryeministri spanjoll Pedro Sánchez e përshkroi atë si “një aktore me talent të jashtëzakonshëm dhe përulësi të madhe, që na la shumë herët.” Edhe aktori i madh Antonio Banderas shkroi në rrjetet sociale: “Kinemaja spanjolle është në zi për humbjen e Verónica Echegui. Ngushëllime familjes dhe miqve të saj.”
Ngushëllime prekëse erdhën edhe nga aktori argjentinas Juan Diego Botto, i cili tha: “Jam i tronditur nga humbja e aktores së madhe Verónica Echegui. Një humbje e madhe për kinemanë tonë.”
Fansat gjithashtu e kanë përkujtuar si një “legjendë që u shua shumë shpejt”, duke ndarë mesazhe dhimbjeje dhe dashurie në rrjete sociale.
Përveç karrierës në film dhe televizion, Verónica ishte një zë i fuqishëm kundër abuzimeve seksuale në industrinë e kinemasë. Në një intervistë të vitit 2020, ajo kishte treguar se ishte përballur tri herë me sulme seksuale gjatë punës së saj.
Ndërsa Spanja e kujton me nderim dhe dhimbje, trashëgimia e Verónica Echegui mbetet e gjallë në filmat dhe mesazhet e saj të guximshme.
