Ylli në ngritje i muzikës latine dhe influcuesja, Maria De La Rosa, e njohur me emrin e artit DELAROSA, është qëlluar për vdekje dhe dy të tjerë janë plagosur rëndë në një sulm në Los Angeles.
Mediat e huaja shkruajnë se të shtënat ndodhën në Northridge, në Luginën e San Fernando, pak para orës 1:30 të mëngjesit të së shtunës.
Zyrtaret e LAPD identifikuan 22-vjeçaren Maria De La Rosa, si viktimë të hënën, teksa po hetojnë mbi rrethanat e të shtënave.
Persona të armatosur thuhet se iu afruan një automjeti të parkuar dhe hapën zjarr ndaj pasagjerëve në atë që policia dyshon se ishte një sulm i lidhur me bandat.
“Dëshmitarët përshkruan se kishin parë dy të dyshuar meshkuj që i afroheshin një automjeti që ishte parkuar në Rrugën Bryant”, tha policia e Los Angelesit në një deklaratë të hënën, duke shtuar:
“U qëlluan disa plumba drejt disa viktimave që ishin parkuar në zonë me automjetin e tyre.”
Policia tha se tre persona ishin brenda makinës kur filluan të shtënat. Të tre u goditën me armë zjarri.
Sipas mediave të huaja, sulmi ndodhi në Rrugën Bryant, pak në lindje të Tampa Avenue, një bllok përndryshe i qetë i lagjes Northridge.
DELAROSA u dërgua me urgjencë në një spital aty pranë nga një person privat, por mjekët nuk mundën ta shpëtonin.
Hetuesit e policisë së Los Angeles thonë se personat që qëlluan me armë iu afruan makinës së parkuar të viktimave në këmbë përpara se ta shpërthenin automjetin me disa plumba nga afër.
Nuk janë bërë arrestime dhe detektivët nuk kanë dhënë detaje rreth një motivi të mundshëm.
DELAROSA, e cila ka pak më shumë se 40,000 fansa në “Instagram”, sapo kishte filluar të depërtonte në skenën e muzikës latine, duke publikuar këngën e saj “No Me Llames” në gusht.
