Policia e Sarandës ka reaguar lidhur me ngjarjen tragjike të ndodhur një dite më parë, ku mbrëmjen e së enjtes i riu Igli Gjoça humbi jetën tragjikisht. Sipas asaj që familjarët thanë, 34-vjeçari nga Delvina ndërroi jetë pasi ra në kontakt me rrymën elektrike, ndërkohë që përmes një njoftimi zyrtar policia sqaron se në momentin kur dhe ndodhi ngjarja, Gjoça ishte duke punuar në lokalin e shtetasit E.F, 40 vjeç.
Nga veprimet e para hetimore dyshohet se i riu, i cili shumë shpejt do të bëhet dhe baba i një vajze, ka humbur jetën si pasojë e kontaktit me rrymën elektrike.
Lidhur me këtë ngjarje policia ka prangosur pronarin 40-vjeçar të lokalit i cili akuzohet për veprat penale “Shkelja e rregullave të mbrojtjes në punë” dhe “Punësimi i paligjshëm”, pasi nga hetimet ka rezultuar se 34-vjeçari ishte punësuar jo në mënyrë të ligjshme.
Më herët njoftuam se Igli Gjoça ishte pronar i një servisi automjetesh në zonën e Vrionit. Fillimisht u tha se ngjarja tragjike ndodhi në servisin e tij, mirëpo blutë e Sarandës sqarojnë së fundmi se tragjedia u regjistrua në lokalin ku dhe 34-vjeçari shkonte për të punuar dhe për të siguruar më tepër të ardhura për familjen e tij.
“Specialistët për Hetimin e Krimeve të Komisariatit të Policisë Sarandë arrestuan në flagrancë për veprat penale “Shkelja e rregullave të mbrojtjes në punë” dhe “Punësimi i paligjshëm”, shtetasin E. F., 40 vjeç, banues në Ksamil, administrator i një lokali në Sarandë, pasi dje, gjatë punës në këtë lokal, ka humbur jetën shtetasi I. Gj., 33 vjeç, banues në Sarandë, i cili ishte punësuar në mënyrë të paligjshme. Nga veprimet e para hetimore dyshohet se ky shtetas ka humbur jetën si pasojë e kontaktit me rrymën elektrike. Vijojnë hetimet për dokumentimin e rrethanave të rastit”, njofton Policia.
