Prokuroria e Posaçme kundër Korrupsionit dhe Krimit të Organizuar ka thërritur ish-kryeministrin Sali Berisha lidhur me hetimet për dosjen e “21 Janarit”.
Burime për mediat bëjnë me dije se lideri i të djathtëve, i cili asokohe mbante postin e kryeministrit të Shqipërisë është thirrur të paraqiten të premten në orën 10:00 pranë ambienteve të Strukturës së Posaçme.
Fletëthirrja është dërguar në adresën e Parlamentit, në selinë e Partisë Demokratike dhe në banesën e ish-kryeministrit Berisha.
Mbrëmjen e 30 tetorit pranë ambienteve të SPAK u paraqit edhe ish-kryetari i Partisë Demokratike, Lulzim Basha. Shkurtimisht për mediat, Basha bëri me dije se u thirr nga Struktura e Posaçe si person në dijeni për të dëshmuar lidhur me ngjarjen e 21 Janarit, ku u vranë 4 protestues.
Më 21 Janar të vitit 2011, Lulzim Basha ka mbajtur postin e ministrit të Brendshëm. Në korrik të vitit të kaluar SPAK njoftoi se kishte regjistruar zyrtarisht procedimin penal për vrasjen e katër protestuesve, Ziver Veizi, Faik Myrtaj, Hekuran Deda dhe Aleks Nika.
Sipas njoftimit të SPAK, janë regjistruar hetimet për veprat penale “Vrasje në rrethana të tjera cilësuese në bashkëpunim”, “Shpërdorim i detyrës” në bashkëpunim, dhe “Kryerja e veprimeve që pengojnë zbulimin e së vërtetës” në bashkëpunim.
Hetimi ka për qëllim të zbardhë rolin e ish-kryeministrit Sali Berisha dhe ish-ministrit të Brendshëm Lulzim Basha. Vendimi i Gjykatës së Lartë ka theksuar detyrimin e SPAK për të hetuar përgjegjësitë e Sali Berishës, Lulzim Bashës, Ndrea Prendit dhe të tjerëve lidhur me vrasjen e katër personave të pafajshëm në bulevard, ngjarje për të cilën deri më tani nuk është verifikuar roli i drejtuesve shtetërorë.
