Krimi i ndodhur ditën e djeshme në Roskovec, ku i moshuari qëlloi për vdekje gruan e tij e më pas kreu vetëvrasje ka tronditur opinionin publik. E sot, familja Rrapaj ka hapur dyert e mortit, por varrimi i dy viktimave do të bëhet i ndarë.
Dashuri Rrapaj do të përcillet për në banesën e fundit në orën 13:00, në Allambreas të Beratit, ku është bijë. Ndërkohë që trupi i 80-vjeçarit, Shefit Rrapaj ndodhet ende në morgun e Fierit dhe nuk po tërhiqet nga askush prej 9 fëmijëve të tij, të cilët aktualisht ndodhen në banesën ku ndodhi krimi, në një situatë tepër të rënduar emocionale.
Ngjarja ka tronditur mbarë vendin, pasi të afërm dhe fqinjët e viktimave janë shprehur se ata ishin njerëz të qetë, joproblematik dhe mjaft punëtorë. Ndërsa janë ngritur dyshimet se shkak i ngjarjes së rëndë është bërë djali i tyre i vogël, për të cilin fqinjët thanë se i linte të ardhurat në lloto.
Kjo dyshohet të ketë qenë problematika e fundit çka kishte shkaktuar debate të ashpra mes çiftit, ku diskutimi më i fundit rezultoi fatal për ta.
