I riu në foto është 21-vjeçari shqiptar, i cili humbi jetën në Itali pasi u godit nga rryma elektrike teksa po çmontonte skela në një lartësi prej gjashtë metrash, pas përfundimit të punimeve në një ndërtesë në zonë.
Sipas raportimeve të para, Pashtrik Krasniqi dyshohet se ka prekur aksidentalisht një kabllo elektrike me pulpën e këmbës, duke pësuar një goditje fatale nga tensioni i lartë.
Edhe pse ndërhyrja e ekipeve të emergjencës ishte e menjëhershme, për të riun me origjinë nga Kosova nuk mund të bëhej asgjë.
Ngjarja ndodhi një ditë më parë në Villadossola, në provincën Verbano-Cusio-Ossola, Itali.
Autoritetet italiane kanë nisur hetimet për të sqaruar rrethanat e sakta të tragjedisë.
