Bota e artit dhe kinemasë është tronditur nga lajmi për ndarjen nga jeta të aktorit Owain Rhys Davies, i njohur për rolet e tij në teatër dhe në ekran, përfshirë serialin kult “Twin Peaks”. Ai ka ndërruar jetë në moshën 44-vjeçare.
Lajmin e hidhur e konfirmoi vëllai i tij, Rhodri Davies, përmes një deklarate prekëse të publikuar më 31 maj. Ai tha se vdekja e aktorit erdhi si një “tronditje e madhe” për familjen dhe të afërmit.
“Ndërsa ende ka pyetje pa përgjigje lidhur me rrethanat e vdekjes së tij, kuptimi ynë në këtë fazë është se Owain u nda nga jeta papritur, natyrshëm dhe në paqe,” shkroi Rhodri.
Familja falënderoi publikisht të gjithë ata që kanë dërguar mesazhe ngushëllimi, duke theksuar se dashuria dhe mirësia e Owain kishin prekur shumë njerëz.
Owain Rhys Davies ndërtoi një karrierë të pasur si në teatër ashtu edhe në film. Ai mori pjesë në produksione prestigjioze të “Royal National Theatre” dhe në skenën e njohur të “West End” në Londër. Në ekran, ai u shfaq në projekte të njohura si seriali i Netflix “The OA”, filmi “Alice Through the Looking Glass” dhe “A Serial Killer’s Guide to Life”.
Megjithatë, publiku e kujton veçanërisht për rolin e Agjentit Wilson në rikthimin e serialit legjendar “Twin Peaks” në vitin 2017, nën regjinë e David Lynch.
Në një postim të fiksuar në profilin e tij në “Instagram”, Owain kishte ndarë një foto me regjisorin e famshëm, duke e cilësuar eksperiencën si një nga momentet më të bukura të jetës së tij artistike.
“Çfarë udhëtimi i mrekullueshëm ishte të punoje me këtë legjendë,” kishte shkruar ai në vitin 2017. “Ishte një nder të bëhesha pjesë e familjes së ‘Twin Peaks’.”
Pas lajmit për vdekjen e tij, Teatri Kombëtar i Uellsit publikoi gjithashtu një homazh emocional për aktorin.
“Owain ishte një talent i jashtëzakonshëm, puna e të cilit pasuroi teatrin dhe ekranin. Pasioni, krijimtaria dhe përkushtimi i tij lanë gjurmë të pashlyeshme në jetën kulturore të Uellsit,” thuhej në deklaratë.
