Leonard Nikolli është shtetasi i cili këtë të mërkurë terrorizoi zyrat e IMT-së në Tiranë ku dhe pretendoi se ishte i armatosur dhe se do të vriste drejtorin Klajdi Meçi.
Ka qenë ky i fundit ai i cili pasi u vu në dijeni nga inspektorët për ngjarjen e ndodhur menjëherë telefonoi Policinë. Pas kallëzimit të bërë nga drejtori, efektivët e Komisariatit nr.3 në Tiranë shoqëruan 61-vjeçarin Nikolli.
Burime për Newsbomb bëjnë me dije se ky shtetas ishte paraqitur ditën e sotme pranë ambienteve të institucionit duke kërcënuar drejtorin dhe pretenduar se ishte i armatosur. Në momentin kur dhe ndodhi ngjarja, Klajdi Meçi nuk ishte i pranishëm pasi ishte në terren, teksa u vendos në dijeni nga stafi.
“Jam i armatosur, ku është drejtori se do e vras”, mësohet të ketë thënë Leonard Nikolli, teksa në vijim është shprehur se do ia bënte njëlloj si gjyqtarit Astrit Kalaja.
Në deklarimet e tij paraprake para grupit hetimor 61-vjeçari është shprehur se ka pasur probleme me pronat dhe për këtë bënte përgjegjës IMT Tiranë. Lidhur me këtë ngjarje deri më tani nuk ka një reagim zyrtar nga Policia e Shtetit të cilët po punojnë për zbardhjen e plotë të saj. Priten më tepër detaje në vijim.
