Vdekja tragjike e të riut Albjano Kreçi pasditen e së hënës në Ksamil, ka tronditur familjen dhe rrethin shoqëror të 22 vjeçarit. Në rrjetet sociale vazhdojnë prej katër ditësh mesazhet e pafundme për ikjen e parakohshme dhe të padrejtë të Albjanos.
Ai ishte vëllai i vetëm i dy motrave dhe pasditen e së hënës, më 15 Qershor, duke përdorur një makinë uji "jet car" në gjirin e Ksamilit, u përplas fatalisht me skafin e Policisë Kufitare, duke mbetur i plagosur rëndë. Efektivët i dhanë ndihmën e parë, por Albjano mbylli sytë përgjithmonë.
Një nga motrat e tij, ka bërë një reagim drithërues në rrjetet sociale, duke publikuar një kolazh fotografish të 22 vjeçarit, shoqëruar me një këngë vaji që flet për dhimbjen e pamatë të nënës, për humbjen e të birit.
"Dritë e motrës mezi presim të vijmë afër teje dhe si gjithmonë të qeshim dhe të rrimë prapë të gjithë bashkë… Engjëll i bukur", shkruhet në mesazhin që ndan vajza.
Të pafundme janë edhe postimet e shokve dhe miqve të Albjanos, të cilat tregojnë për një djalë energjik dhe gjithmonë i qeshur, por që fatalisht humbi jetën nga pasioni për mjetet ujore që i donte më së shumti.
Lajmi i ndarjes së tij nga jeta ka sjellë dhimbje dhe trishtim në Ksamil, ku Albjano njihej si një djalë i lindur dhe i rritur në këtë qytet, duke lënë pas pikëllim te familjarët, miqtë dhe të gjithë ata që e njihnin.
