Astrologia Meri Gjini ka bërë parashikimin e horoskopit për javën në emisionin “Mes’dritë”, në Vizion Plus, me dyshen e moderatorëve Alma Çelaj dhe Syrjan Rahova.
Edhe pse Hëna është në rënie te Peshqit, jemi në pritje të një Hëne të Re shumë të bukur drejt fundit të javës. Kjo Hënë te Peshqit zgjon ndjenja që dukeshin të harruara, duke nxjerrë në sipërfaqe empatinë, romantizmin dhe intuitën.
Aktualisht, Marsi ndodhet te Dashi në gradën e 24-t, së bashku me Saturnin dhe Neptunin. Dielli është në gradën e 20-të te Demi, Venusi në të 20-tën te Binjakët dhe Jupiteri (planeti i fatit) te Gaforrja në gradën e 20-të.
Një hyrje shumë e rëndësishme është trekëndëshi i Diellit me Jupiterin, që sjell mundësi të shkëlqyera për punën, pagesat, çështjet bankare dhe ato sociale. Gjithashtu, muaji maj favorizon shumë martesat dhe zgjerimin familjar.
Plutoni është kthyer në retrogradë që nga data 5 maj dhe do të ketë ndikim minimal gjatë gjithë verës. Të lindurit nga data 8 deri në 18-19 të çdo muaji duhet të vendosin gjëra të rëndësishme në axhendën e tyre që sot.
Parashikimi për Shenjat e Horoskopit:
Dashi: Me Marsin në shenjën e tyre, ata do të jenë shumë aktivë. Të lindurit në dhjetëditëshin e fundit mund të ndihen pak të stresuar nga ritmi, ndërsa dy dhjetëditëshat e parë kanë qëndrueshmëri. Favorizohen shumë në anën sociale.
Demi: Janë protagonistët e javës me Diellin dhe Mërkurin në shenjë. Duhet të përdorin intuitën për ndryshime që lidhen me ekonominë, investimet apo ndërrimin e adresës. Pas largimit të Uranit, ata po fitojnë stabilitet dhe vetëbesim për plane afatgjata.
Binjakët: Me Venusin në shenjë, është momenti të zgjidhin shqetësimet e vjetra në raportet njerëzore. Java është e mirë për të diskutuar dhe për t’i dhënë drejtim jetës personale ose ndryshimit të statusit.
Gaforrja: Jupiteri në shenjë u jep mundësi për kontrata dhe marrëveshje të rëndësishme, por këshillohet t’i mbajnë planet për vete deri në realizim. Të lindurit në fund të shenjës që kërkojnë punë duhet të dërgojnë CV ose të kryejnë intervista sot dhe nesër.
Luani: Moment i mirë për profesionin dhe shtëpinë. Megjithatë, duhet të bëjnë kujdes me komunikimin, pasi Mërkuri te Demi mund t’i bëjë kokëfortë. Po nis një periudhë dymujore ku do të ndërtojnë strategji të mëdha për karrierën.
Virgjëresha: Favorizohen në ambientet profesionale dhe do të kenë lëvizje pozitive me paratë. Shtëpia dhe familja do të jenë mbështetja e tyre kryesore këtë javë.
Peshorja: Venusi dhe Jupiteri i favorizojnë në lidhje me pamjen dhe stilin e tyre. Në aspektin profesional, duhet të jenë proaktivë dhe të propozojnë ide të reja, pasi do të marrin përgjigje pozitive.
Akrepi: Kanë kontroll mbi territorin dhe financat e tyre, gjë që u jep shumë vetëbesim. Nuk duhet të humbin kohë me debate të kota, por të fokusohen te veprimet konkrete.
Shigjetari: Të lindurit në ditët e para mund të kenë të papritura nga Urani, ndërsa dhjetëditëshi i fundit është me fat në dashuri. Lajme të mira priten për dokumente, shkollim ose lëvizje vendi.
Bricjapi: Java nis me mundësi për të qartësuar marrëdhëniet në punë ose për të kërkuar rritje rroge. Për ata që merren me punë sezonale, dita e sotme shënon mbarësi. Kanë nevojë edhe për pak pushim drejt fundit të javës.
Ujori: Stresi është më i kontrollueshëm dhe ndihen më optimistë. Kanë mundësi për përmirësim në punë, por duhet të bëjnë kujdes që të mos jenë shumë të prerë në komunikimin me fëmijët ose pasardhësit.
Peshqit: Me Hënën në shenjë, ndihen të ngarkuar emocionalisht, por për mirë. Është periudhë e shkëlqyer për ata që duan të krijojnë familje ose të martohen. Duhet të kërkojnë hapur atë që duan dhe të mos presin që të tjerët t’ua kuptojnë mendjen. Prioriteti i tyre tani është shtëpia dhe dashuria, jo karriera./vizionplus.tv
