Një ngjarje tragjike ka tronditur futbollin portugez gjatë një ndeshjeje të Kupës Rajonale në Algarve, ku mbrojtësi i majtë i LGC Moncarapachense, Nassur Bacem, humbi jetën në fushë.
27-vjeçari pësoi një arrest kardiak në minutën e 27-të të sfidës kundër Imortal DC. Pavarësisht ndihmës së menjëhershme mjekësore nga stafi i të dyja ekipeve dhe shërbimet e emergjencës, përpjekjet për ta shpëtuar dështuan dhe vdekja u konfirmua në vendngjarje
Bacem kishte nisur karrierën te sektori i të rinjve i Sporting Braga-s dhe më pas kishte luajtur në kampionatet kombëtare portugeze. Humbja e tij ka tronditur komunitetin futbollistik lokal dhe më gjerë.
Klubi LGC Moncarapachense reagoi me një njoftim zyrtar, duke e përshkruar ngjarjen si “trishtim të thellë” dhe duke ftuar tifozët dhe komunitetin e futbollit të qëndrojnë pranë familjes së lojtarit në këtë kohë dhimbjeje.
