Nëse keni dyshime se mund të vuani nga mungesa e hekurit në trupin tuaj, ky artikull shpjegon shenjat e para që sjell kjo e fundit.
Sipas mjekëve shenjat e para të mungesës së hekurit në trup janë lodhje, zbehti në fytyrë ku shkak për këtë bëhet edhe humbja e gjakut gjatë menstruacioneve ose shtatzënisë.
Për këtë arsye, “viktimat” më të shpeshta të anemisë nga mungesa e hekurit janë gratë në moshë riprodhuese.
Në çdo rast, mungesa e hekurit trajtohet në mënyrë natyrale nëpërmjet dietës, konsumimit të ushqimeve të pasura me hekur, por edhe me suplemente medicinale të hekurit.
Tek gratë, menstruacionet e rënda, që barazohen me humbje të mëdha gjaku, ose shtatzënia janë arsyet e zakonshme të mungesës së hekurit. Në shtatzëni , faktori kryesor që çon në anemi është dieta e cila shpesh është “e varfër” me hekur.
Natyrisht, çdo faktor tjetër që shkakton trupin të humbasë gjak mund të çojë në mungesë hekuri. Simptomat e zakonshme të mungesës së hekurit përfshijnë ndjenjën e lodhjes dhe mungesës së energjisë, gulçim, palpitacione dhe zbehje.
Si të matni nivelin e hekurit në trupin tuaj?
Një test i thjeshtë gjaku mund të konfirmojë një problem me hekurin. Analiza e gjakut tregon nivelet e hekurit në gjak. Nëse nivelet e hekurit janë të ulëta, nivelet e ferritinës ka të ngjarë të jenë gjithashtu të ulëta (ferritina pasqyron nivelin e hekurit të depozituar në trup). Hemoglobina zvogëlohet edhe në gjak kur kemi mungesë hekuri, ndërsa masa totale e rruazave të kuqe të gjakut është më e vogël se normalja në anemi. Nëse diagnostikohet mungesa e hekurit, është e mundur që mjeku të rekomandojë suplemente hekuri (në tableta ose ampula). Zakonisht, trajtimi zgjat rreth 6 muaj, por ju mund t’i merrni suplementet më pak ose më gjatë, në varësi të shkallës së mungesës që keni.
Këto suplemente si produkte të tjera farmaceutike, mund të kenë efekte anësore . Ju mund të përjetoni diarre ose dhimbje barku, por është e rëndësishme të vazhdoni t’i merrni ato. Për të shmangur efektet anësore dhe për të siguruar një përthithje më të mirë, preferohet të konsumoni suplementet para ose pas vaktit tuaj, ndërsa një gotë me lëng portokalli natyral do të funksionojë gjithashtu për shkak të vitaminës C që përmban.
Përveç kësaj, është e mundur që mjeku të kërkojë analiza të përsëritura gjaku pas disa muajsh nga fillimi i trajtimit, për të monitoruar efektivitetin e tij dhe për të vendosur nëse do t’ju rekomandojë të vazhdoni trajtimin apo jo.
A janë suplementet zgjidhja e vetme për të plotësuar nevojën e hekurit në trup?
Suplementet e hekurit nuk janë zgjidhja e vetme për të përballuar aneminë, pasi ka praktika që mund t’i zbatojmë vetë. Për shembull, një faktor kryesor që përcakton nivelet e hekurit në gjak është dieta. Pra, duhet të vini re nëse në dietën tuaj ditore ka mjaft ushqime të pasura me hekur dhe nëse jo, të bëni ndryshimet përkatëse.
Për shembull, nëse doni të përfitoni sa më shumë nga hekuri që ofron ushqimi, mos anashkaloni të hani perime me gjethe jeshile, mish të kuq, fruta të thata si kajsi, kumbulla të thata dhe rrush të thatë, por edhe bishtajore (fasule, thjerrëza). Njëkohësisht, do të ishte mirë të shmangeshin ushqimet që nuk favorizojnë përthithjen e hekurit nga organizmi, si çaji, kafeja, produktet e qumështit, si dhe ushqimet e pasura me acid fitik, si drithërat.
