Detaje të reja tronditëse janë bërë publike nga vrasja e 14-vjeçarit Erald Xhejo, ngjarje e ndodhur më 14 gusht në fshatin Pirg, Maliq.
Burime nga hetimet tregojnë qartë përfshirjen aktive të familjarëve të autorit, Enedio Guri, në përpjekje për të fshehur provat dhe për të shmangur arrestimin e të miturit.
Sipas të dhënave të siguruara nga News24, Roland Guri, xhaxhai i autorit, ka marrë thikën me të cilën u krye krimi, e ka larë për t’i hequr gjurmët e gjakut, dhe më pas e ka futur në xhep.
Babai i autorit, Edison Guri, ka ndihmuar të birin të fshihet në një banesë tjetër për të shmangur arrestimin.
Edhe Flori Çela, 34 vjeç, është vënë nën hetim, pasi makina e tij u përdor nga Enedio për t’u larguar nga vendi i krimit, duke sjellë ndaj tij akuzën e moskallëzimit të krimit.
Të dy adoleshentët, viktima dhe autori, ishin të shoqëruar nga shokët e tyre në momentin e përplasjes fatale.
Katër të mitur u arrestuan pas ngjarjes për moskallëzim të krimit dhe veprime që pengojnë zbulimin e së vërtetës.
Nga hetimet rezulton se konflikti mes dy të rinjve kishte nisur rreth një vit më parë, dhe rifilloi pas një takimi të rastësishëm në një lokal të fshatit, ku grindja nisi me fjalët “Pse më shikon?”, duke përfunduar me një goditje të vetme me thikë në zemër ndaj viktimës.
Autori, Enedio Guri, ndodhet në gjendje të rëndë psikologjike, dhe ende nuk është marrë në pyetje. Dëshmia e tij pritet të merret në praninë e avokatit, psikologut dhe familjarëve, ndërsa ndaj tij rëndon akuza për “vrasje me dashje”.
Arrestimet dhe provat e sekuestruara
Policia e Korçës ka arrestuar 8 persona në lidhje me këtë ngjarje:
• Enedio Guri, 14 vjeç, për “vrasje me dashje” dhe “drejtim të automjetit në mënyrë të parregullt”
• Edison Guri (babai) dhe Roland Guri (xhaxhai), për “veprime që pengojnë zbulimin e të vërtetës”
• Flori Çela, për “moskallëzim krimi”
• 4 të mitur, për “moskallëzim krimi” dhe “pengim të drejtësisë”
Policia ka sekuestruar thikën e krimit, automjetin me të cilin u tentua arratisja, si dhe 5 celularë.
