Gazetari i njohur i transmetuesit publik italian Rai, Sigfrido Ranucci, ka qenë shënjestër e një sulmi të rëndë me bombë, ku u shkatërruan plotësisht dy makina, njëra prej të cilave e vajzës së tij.
Ngjarja ndodhi vonë të enjten në mbrëmje, kur dy pajisje shpërthyese të improvizuara u përdorën për të shkatërruar makinat e parkuara jashtë shtëpisë së gazetarit në zonën bregdetare të Campo Ascolano, pak jashtë Romës.
Për fat të mirë, nuk pati viktima apo të lënduar, megjithëse ndërtesa e gazetarit u dëmtua nga jashtë. Sigfrido Ranucci foli me Corriere della Sera pak pas orës 2:00 të mëngjesit në telefon: “Vajza ime, e cila sapo ishte larguar, mund të kishte humbur jetën. Do të ngre padi”.
Ranucci ka marrë kërcënime të shumta kundër jetës së tij, pasi seriali i tij ka trajtuar vazhdimisht raste korrupsioni dhe krimi të organizuar — përfshirë këtu marrëveshjen për emigrantët mes Shqipërisë dhe Italisë. Vitin e kaluar, ai dhe të afërmit e tij kishin gjetur dy plumba në hyrje të shtëpisë.
Menjëherë pas ngjarjes, Prokurorët antimafia të Romës nisën hetimet. Aktualisht, akuzat po ngrihen për dëmtim me rrethanë rënduese të metodave mafioze, duke sugjeruar që ky ishte një sulm i organizuar.
Ky sulm i rëndë ndaj një gazetari të njohur në Itali tregon se kërcënimet dhe dhuna kundër atyre që zbulojnë krimin e organizuar vijojnë të jenë të pranishme, duke e kthyer ngjarjen në një çështje serioze për sigurinë e medias.
