Ka ndërruar jetë në spitalin e Traumës, një nga 5 të plagosurit nga përplasja me armë ditën e djeshme në Laç.
Fatkeqësisht, 24-vjeçari Geri Bitri nuk ka arritur t’u mbijetojë plagëve të marra dhe ka gjetur vdekjen gjatë natës në spitalin e Traumës.
Në gjendje të rëndë në spitalin e Traumës është edhe Ndoj, 26-vjeç, ndërsa tre të plagosurit e tjerë Daniel Gjeloshi, 26-vjeç, Liridon Ismaili, 26-vjeç, dhe Angjelina Gjezaj, 58 vjeç janë në gjendje stabël me dëmtime në gjymtyrët e poshtme.
Ditën e djeshme, pas një aksidenti automobilistik, në afërsi të Kishës së Laçit, një grup të rinjsh u përfshinë në sherr fizik. Përplasja eskaloi në përdorimin e armëve ku breshëri plumbash u derdhën duke lënë të plagosur 5 persona, mes tyre dhe Bitri i cili ka ndërruar jetë gjatë natës.
Plumbat që u derdhën drejt mjetit ku ndodheshin të rinjtë kanë kapur edhe një grua të pafajshme, e cila ka qenë duke shitur qirinj për besimtarët që vizitojnë Kishën e Laçit.
Disa orë pas ngjarjes së rëndë, Policia e Lezhës bëri me dije se ka arrestuar 2 autorët e krimit, njëri prej të cilëve mbeti edhe i plagosur.
