Një aksident i rëndë u regjistrua mëngjesin e kësaj të diele në aksin kombëtar Peqin-Elbasan, ku fatkeqësisht kanë humbur jetën nënë dhe bir, ndërsa dy persona të tjerë ndodhen në spital në gjendje të kritike për jetën.
Viktimat Fatbardha dhe Klodian Shahini, përkatësisht 55 dhe 33 vjeç po udhëtonin me automjetin Mercedes Benz, po për shkak të goditjes së fortë, ata u bllokuan brenda në automjet ku dhe humbën jetën.
Në aksident u përfshinë një furgon me pasagjerë dhe një automejt tip Mercedez Benz. Nga informacionet paraprake mësohet se ka qenë Benzi i cili ka goditur furgonin e drejtuar nga shtetasi Anesti Bufi.
Në njoftimin zyrtar të policisë Elbasan thuhet se furgoni që drejtohej nga shtetasi A. B., 44 vjeç, është përplasur me automjetin tip “Benz”, me drejtues shtetasin K. Sh.
Si pasojë e përplasjes kanë humbur jetën drejtuesi i automjetit tip “Benz” shtetasi K. Sh., dhe shtetasja F. Sh., 55 vjeçe, pasagjere në këtë automjet.
Gjithashtu, janë dëmtuar drejtuesi i furgonit, shtetasi A. B., dhe 4 pasagjerë që udhëtonin me furgon, të cilët janë transportuar në spital për ndihmë mjekësore dhe janë jashtë rrezikut për jetën.
Shërbimet e Policisë dhe grupi hetimor ndodhen në vendngjarje dhe vijojnë punën për zbardhjen e plotë të rrethanave dhe shkakut të aksidentit.
