Në një renditje surprizë dhe tejet entuziaste të publikuar nga CNN, kënga përfaqësuese e Shqipërisë, “Zjerm” e Shkodra Elektronike, është shpallur kënga më e mirë mes 26 finalistëve të Eurovision 2025.
Në përshkrimin që CNN i bën këngës shqiptare thuhet se bëhet fjalë për një duet që “nuk e pëlqen Eurovision-in” – dhe pikërisht për këtë arsye, ndoshta do ta fitojë. Kombinimi i zjarrtë i alternativës, absurditetit dhe stilit unik duket se ka mahnitur kritikët ndërkombëtarë.
“Zjerm” përshkruhet si një këngë që “nuk fal”, që thyen rregullat dhe pritet me entuziazëm nga fansat, të cilët kanë reaguar në masë në rrjete sociale.
Ky është një vlerësim historik për Shqipërinë, që rrallëherë ka hyrë në dhjetëshen më të mirë në Eurovision, e jo më të renditet në krye të një liste kaq prestigjioze ndërkombëtare. Renditja e CNN është bazuar në performancat live, impaktin kulturor dhe risitë muzikore.
Shqipëria ka lënë pas emra të mëdhenj si Austria, Finlanda, Franca dhe Italia, që janë renditur në pesëshen e parë. Vlerësimi i tillë nuk është vetëm një ogur i mirë për natën finale, por edhe një dëshmi se shija muzikore në Eurovision po evoluon drejt origjinalitetit dhe guximit artistik.
Me këtë sukses, Shkodra Elektronike jo vetëm që ka thyer klishetë, por ka sjellë folklorin shqiptar në një format modern dhe ndërkombëtar, duke përfaqësuar denjësisht kulturën e vendit në një nga skenat më të mëdha europiane.
