Tre shtetas shqiptarë humbën jetën më 18 gusht në një aksident tragjik të ndodhur në Greqi. Një kamion u përplas me dy makina, duke bërë që ato të merrnin flakë.
Një dëshmitar okular përshkroi momentet dramatike pas përplasjes.
“Mund t’i dëgjonim të tre personat duke na u lutur t’i nxirrnim jashtë. ‘Na nxirrni jashtë, na nxirrni jashtë’. Ata bërtisnin ‘ndihmë, na nxirrni jashtë, na shpëtoni’”, tha ai për mediat greke.
“Njerëzit po digjeshin të gjallë. I pamë me sytë tanë dhe të tre ishin karbonizuar. Nuk mundëm t’i nxirrnim jashtë, ishin bllokuar.”
Duke shpjeguar se çfarë ndodhi, ai tha gjithashtu se “gomat filluan të shpërthenin.”
“Brenda një sekonde makina mori flakë. Kishte shumë shpërthime.”
Ata po ktheheshin nga një dasmë
Viktimat e aksidentit tragjik janë Viktor Bushi 59 vjeç, Klarenc Kacaj 61 vjeç dhe Marianka Bushi Aliraj 57 vjeçe, ndërsa e plagosur mbeti Mardalena Kaçaj 49 vjeçe.
Të katër po ktheheshin nga një dasmë në Xanthi, ndërsa në makinën e dytë që goditi kamioni ishin vajza e Viktorit dhe Mariankës, dhëndri i tyre dhe dy nipërit e mbesat e tyre, të moshës 4 dhe 6 vjeç.
Kur kamioni goditi makinën që drejtohej nga 59-vjeçari, ata më pas u përplasën me makinën në të cilën udhëtonin vajza e tij shtatzënë, bashkëshorti i saj dhe dy fëmijët e tyre./vizionplus.tv
