Një aksident tragjik ka ndodhur në orët e para të mëngjesit të kësaj të shtune në autostradën Lezhë-Milot, ku janë përplasur dy automjete dhe për pasojë, shoferi dhe pasagjeri i njërit prej tyre kanë humbur jetën.
Ngjarja rrugore ka ndodhur rreth orës 01:30, ku janë përfshirë në një aksident automjeti me drejtues shtetasin A. Gj. dhe automjeti me drejtues shtetasin Ramazan Harapi, 66 vjeç.
Përplasja ka qenë shumë e fortë dhe për pasojë, shoferi 66 vjeçar ka ndërruar jetë në vendngjarje. Si pasojë e plagëve të rëndë, Policia bën me dije se ka humbur jetën dhe pasagjeri që ndodhej në mjetin e Ramazanit, shtetasi Agim Harapi, 52 vjeç.
Nga veprimet e para hetimore në vendin e ngjarjes, dyshohet se shkak i aksidentit rrugor të jetë, krahas kushteve atmosferike me reshje të dendura shiu, pozicionimi i gabuar në karrexhatë i automjetit me drejtues shtetasin A. Gj., 33 vjeç, i cili rezultoi në gjendje të dehur.
33-vjeçari është arrestuar në flagrancë, ndërkohë që grupi hetimor po vijon veprimet për sqarimin e plotë të rrethanave të ngjarjes.
“Rreth orës 01:30, në aksin rrugor Lezhë–Milot, janë përfshirë në një aksident rrugor automjeti me drejtues shtetasin A. Gj. dhe automjeti me drejtues shtetasin R. H., 66 vjeç. Si pasojë e aksidentit, kanë ndërruar jetë shtetasi Ramazan Harapi dhe pasagjeri që ndodhej në automjetin e tij, shtetasi Agim Harapi, 52 vjeç.
Nga veprimet e para hetimore në vendin e ngjarjes, dyshohet se shkak i aksidentit rrugor të jetë, krahas kushteve atmosferike me reshje të dendura shiu, pozicionimi i gabuar në karrexhatë i automjetit me drejtues shtetasin A. Gj., 33 vjeç, i cili rezultoi në gjendje të dehur”, njofton Policia.
