Një ngjarje e rëndë është regjistruar në Besançon të Francës, ku një grua 36-vjeçare u gjet e pajetë në banesën e saj. Sipas mediave franceze, ishte partneri i saj 50-vjeçar ai që njoftoi shërbimet e emergjencës, i shoqëruar nga vajza e tij. Ai konsiderohet personi i fundit që e ka parë të gjallë gruan.
Burri është shoqëruar në polici dhe është marrë në pyetje, por ka mohuar çdo përfshirje në vdekjen e partneres së tij. Ndërkohë, prokuroria e Besançonit ka hapur hetim për “vrasje të bashkëshortes/partneres”.
Sipas hetimeve paraprake, viktima paraqiste shenja të një sindrome asfiksie, e cila mund të jetë shkaktuar ose nga marrja e medikamenteve, ose nga ndërhyrja e një personi tjetër.
Autoritetet bëjnë të ditur se në trupin e saj nuk janë konstatuar shenja dhune, gjak apo gjurmë përleshjeje. Hetuesit kanë vënë re vetëm një shenjë të vogël në pjesën e qafës, e cila për momentin nuk konsiderohet provë përcaktuese.
Mediat raportojnë se partneri i viktimës kishte qenë më parë i dënuar për dhunë në familje ndaj saj, megjithatë ndaj tij nuk kishte asnjë masë ndalimi për kontakt me gruan.
Autopsia dhe analizat toksikologjike, të planifikuara për t’u kryer të enjten, pritet të hedhin dritë mbi shkaqet e sakta të vdekjes së 36-vjeçares./Voxnews
