Një ngjarje tronditëse ka ndodhur në Louisiana të SHBA-së, ku një 31-vjeçar vrau tetë fëmijë, shtatë prej të cilëve të tij, në atë që konsiderohet si masakra më e rëndë me armë zjarri në SHBA që nga viti 2024.
Sipas policisë, autori, i identifikuar si Shamar Elkins, hapi zjarr në tre banesa të ndryshme gjatë orëve të para të mëngjesit të së dielës. Viktimat, të moshës nga 3 deri në 11 vjeç, përfshijnë shtatë motra e vëllezër dhe një kushëri.
Mjeku ligjor identifikoi viktimat si Jayla Elkins, 3 vjeç; Shayla Elkins, 5 vjeç; Kayla Pugh, 6 vjeç; Layla Pugh, 7 vjeç; Markaydon Pugh, 10 vjeç; Sariahh Snoë, 11 vjeç; Khedarrion Snoë, 6 vjeç; dhe Braylon Snoë, 5 vjeç.
Nga sulmi mbetën të plagosura rëndë edhe dy gra, njëra bashkëshorte e autorit, kurse tjetra nëna e fëmijës së tetë të vrarë. CNN raporton se një djalë 13-vjeçar arriti të shpëtojë duke u hedhur nga çatia, duke pësuar vetëm disa thyerje.
Autoritetet thanë se ngjarja ka natyrë familjare, ndërsa pas krimit, autori rrëmbeu një automjet, por u ndoq nga policia, përpara se të qëllohej për vdekje nga oficerët. Rasti po hetohet nga Policia e Shtetit të Louisianës.
Kryebashkiaku i qytetit e cilësoi skenën si “horror”, ndërsa kjo ngjarje ka tronditur komunitetin lokal. Sipas të dhënave, në SHBA janë regjistruar mbi 100 sulme të tilla vetëm gjatë këtij viti, duke rikthyer debatin mbi dhunën me armë dhe sigurinë publike.
