Një ngjarje e rëndë ka tronditur ditën e sotme Roskovecin ku 80-vjeçari Shefit Rrapaj i mori jetën gruas së tij, Dashuri Rrapaj dhe pastaj kreu vetëvrasje.
Fqinjët kanë ngritur dyshimet se shkak i ngjarjes së rëndë dyshohet të jetë djali i vogël i çiftit, i cili nuk kishte shumë kohë që ishte kthyer nga Greqia.
Në një prononcim për mediat njëri nga fqinjët është shprehur se djali mund të jetë arsyeja e zënkës mes të moshuarve pasi ky i fundit shpenzonte të ardhurat në lloto dhe ai ka qenë gjithmonë problematika e familjes. Ndërsa për gruan, fqinji thotë se ishte një person i mirë.
“Ishte nga gratë e rralla, e respektoja si motrën time. Nuk e di si ndodhi. Shefiti nuk konsumonte alkool, kurrë. Ndoshta ardhja e djalit të vogël nga Greqia mund të ketë ndikuar, por nuk i di problemet e tyre. Nuk e dija që kishte armë në shtëpi. Nuk e di shkakun. Nuk e di pse janë grindur 4 ditë më parë. Ndoshta ka lozur lloto, nuk e di. Ajo është problematika gjithmonë. Kanë rreth 20 vite që jetonin këtu dhe i njihnim si komshinjtë më të mirë,” tha ai.
Fqinji zbulon se çifti jetonte vetëm edhe pse kishte nëntë fëmijë, 3 vajza dhe 6 djem, dhe gruaja merrej kryesisht me punët e shtëpisë dhe rritjen e shpendëve. Ndërsa mësohet se ata jetonin prej 20 vitesh në këtë zonë.
Një tjetër fqinj deklaroi se çifti nuk kishte shfaqur probleme në komunitet duke shtuar se ata njiheshin si njerëz të rregullt.
“Nuk kanë pasur probleme me fshatin. Merreshin me bahçen dhe jetën e përditshme. Janë të ardhur nga Levani dhe njiheshin si çift i qetë. Nuk kemi dëgjuar për konflikte mes tyre. Është një ngjarje makabre,” u shpreh ai.
Kujtojmë se ngjarja e rëndë ndodhi pasditen e sotme rreth orës 15:00, ku 80-vjeçari Shefit Rrapaj fillimisht qëlloi për vdekje gruan, e më pas i dha fund jetës së tij.
Autoritetet po vijojnë me punën për zbardhjen e plotë të ngjarjes, ndërsa familja Rrapaj pritet të hapë dyert e mortit për të përcjellë për në banesën e fundit çiftin e moshuar.
Burimet bëjnë me dije se motra e të moshuarës, Dashuries, që sot u vra nga burri i saj, ka shfaqur probleme shëndetësore dhe është nisur me urgjencë drejt spitalit për të marrë ndihmën e nevojshme mjekësore dhe psikologjike.
Kujtojmë se krimi i rëndë ndodhi pasditen e sotme ku i moshuari Shefit Rrapaj i mori jetën gruas së tij, Dashurie Rrapaj dhe pastaj kreu vetëvrasje.
Ngjarja ka tronditur mbarë vendin, pasi të afërm dhe fqinjët e viktimave janë shprehur se ata ishin njerëz të qetë, joproblematik dhe mjaft punëtorë. Ndërsa janë ngritur dyshimet se shkak i ngjarjes së rëndë është bërë djali i tyre i vogël, për të cilin fqinjët thanë se i linte të ardhurat në lloto.
Kjo dyshohet të ketë qenë problematika e fundit çka kishte shkaktuar debate të ashpra mes çiftit, ku diskutimi më i fundit rezultoi fatal për ta.
Mësohet se çifti Rrapaj ishin prindër të 9 fëmijëve, 3 vajzave dhe 6 djemve. Ndërsa prej 20 vitesh jetonin në zonën e Roskovecit, ku do të mbahen mend si njerëz të mirë.
