Greqia është goditur sot, më 16 mars, nga një tjetër tërmet, duke shkaktuar panik dhe shqetësim te banorët e zonës. Lëkundjet sizmike janë ndjerë veçanërisht në rajonin e Chanias, në ishullin e Kretës, duke rikthyer frikën te qytetarët që prej disa ditësh po përjetojnë një seri tërmetesh të njëpasnjëshme në vend.
Edhe pse tërmeti u cilësua nga ekspertët si mesatarisht i fortë, ai ishte i mjaftueshëm për të alarmuar banorët, të cilët dolën nga shtëpitë dhe ndërtesat për arsye sigurie.
Sipas të dhënave zyrtare, tërmeti kishte një magnitudë prej 3.8 ballë të shkallës Rihter dhe u ndje në disa zona të ishullit të Kretës.
Instituti Gjeodinamik i Athinës bëri të ditur se epiqendra e tërmetit u regjistrua rreth 16 kilometra në jug-juglindje të Sougias, ndërsa thellësia fokale ishte rreth 5 kilometra. Thellësia relativisht e vogël bëri që lëkundjet të ndiheshin më qartë nga banorët e zonës përreth.
Fatmirësisht, deri në këto momente nuk janë raportuar dëme materiale apo persona të lënduar si pasojë e këtij tërmeti. Megjithatë, autoritetet dhe ekspertët sizmologë po e monitorojnë situatën me kujdes, pasi aktiviteti sizmik në Greqi ka qenë i shtuar gjatë ditëve të fundit.
Që prej 8 marsit, vendi është përballur me një valë të vazhdueshme tërmetesh në disa rajone. Tërmeti më i fortë gjatë kësaj periudhe ishte ai që goditi zonën e Janinës po më 8 mars, me magnitudë 5.3 ballë të shkallës Rihter. Ai shkaktoi dëme të konsiderueshme në ndërtesa dhe detyroi autoritetet të shpallin gjendje të jashtëzakonshme në disa zona të prekura.
Ndërkohë, të shtunën e kaluar u regjistrua një tjetër tërmet me magnitudë 4.8 ballë në zonën e Kretës. Edhe pse lëkundjet u ndjenë nga banorët, nuk u raportuan dëme materiale apo persona të lënduar. Ekspertët theksojnë se Greqia është një nga vendet më sizmike në Evropë dhe lëkundje të tilla janë relativisht të shpeshta, megjithatë ato vazhdojnë të mbeten shqetësuese për popullsinë lokale.
