Dy të rinj kanë mbetur të plagosur rëndë si pasojë e një sulmi brutal me sende të forta që ka ndodhur mesditën e djeshme në qendër të Konispolit. Bëhet fjalë për një maturant dhe kushërirën e tij 12 vjeçare, të cilët janë dhunuar me shkopa bejsbolli.
Pamjet janë publikuar në rrjetet sociale dhe tregojnë qartë momentin kur maturanti dhe kushërira e tij e mitur ndodheshin në makinë dhe aty janë afruar katër persona, që nisin t’i qëllojnë menjëherë.
Ngjarja ka ndodhur në qendër të qytetit dhe ka kalimtarët janë terrorizuar nga dhuna, ndërkohë që Policia ka njoftuar se ka referuar materialet në Prokurori dhe shpallën në kërkim shtetasit N. D., 18 vjeç, F. A., 18 vjeç, O. L., 19 vjeç dhe një të mitur 17 vjeç.
Të katër të rinjtë janë nga fshati Shëndëlli dhe kanë goditur me egërsi adoleshentin dhe të miturën, duke ju shkaktuar plagë të shumta në trup dhe në kokë, nga shkopinjtë e bejsbollit.
Pavarësisht shpalljes në kërkim të katër autorëve nga Policia, nuk dihet shkaku dhe rrethanat që kanë çuar në këtë episod dhune në qendër të qytetit të Konispolit, duke terrorizuar banorët dhe kalimtarët që janë gjendur rastësisht në shëtitore.
“Specialistët për Hetimin e Krimeve në Stacionin e Policisë Konispol referuan materiale në Prokurori dhe shpallën në kërkim shtetasit N. D., 18 vjeç, F. A., 18 vjeç, O. L., 19 vjeç dhe një të mitur 17 vjeç, banues në fshatin Shëndelli, Konispol, pasi më datë 13.11.2025, në Konispol, kanë goditur me mjete të forta dhe kanë dëmtuar shtetasin E. K., 18 vjeç, si dhe i kanë dëmtuar automjetin. Materialet iu referuan Prokurorisë për veprime të mëtejshme.”
