Detaje të reja janë zbardhur në lidhje me ngjarjen e rëndë të ndodhur paraditen e sotme pranë gjimnazit “Ibrahim Rugova”, ku disa të mitur janë përfshirë në një konflikt fizik që ka degjeneruar në përdorimin e mjeteve prerëse.
Sipas Policisë së Tiranës, përplasja ka ndodhur rreth orës 10:50 në bulevardin “Nënë Tereza”, në afërsi të shkollës. Si pasojë e incidentit, dy 16-vjeçarë janë plagosur dhe ndodhen aktualisht në Spitalin e Traumës, nën kujdesin e mjekëve pasi kanë marrë plagë në zonën e kraharorit dhe janë ende në fazën e ekzaminimeve mjekësore.
Gjithashtu, një tjetër bashkëmoshatar ka pësuar lëndime të lehta dhe fatmirësisht ndodhet jashtë rrezikut për jetën.
Sipas dëshmive të mbledhura në vendngjarje, konflikti mes të rinjve ka nisur pas një përplasjeje verbale dhe ka përfunduar me përdorimin e thikave. Njëri nga të përfshirët ka goditur me mjet prerës 16-vjeçarin në zonën e ballit dhe është larguar me shpejtësi, ndërsa më pas një tjetër nxënës ka ardhur dhe e ka goditur në bark.
Ngjarja ka shkaktuar panik te nxënësit dhe ka krijuar rrëmujë në ambientet përreth shkollës. Policia dhe ambulanca kanë mbërritur menjëherë në vendngjarje, ndërsa shërbimet e rendit kanë shoqëruar disa persona për të dhënë deklaratat e tyre.
Aktualisht, grupi hetimor po punon për të sqaruar rrethanat e plota të ngjarjes, si dhe për të identifikuar dhe ndaluar të gjithë personat e përfshirë në konflikt. Po ashtu, janë sekuestruar pamjet e kamerave të sigurisë për të ndihmuar në hetime.
Dëshmia e nxënësit:
“Une isha aty kur u theren. Ja nguli thiken njeri ketij djalit qe ndodhet ne spital ja nguli te balli dhe ja futi vrapit pastaj erdhi shoku i ktij dhe ja nguli ne bark dhe iku dhe ai me vrap. U zune shume u be shun rremuj nuk kuptum asgje. Pastaj erdhi ambulanca direkt dhe policia. U zune shume nxenes por ky mbeti me lendime te medha. Imagjino ishte krejt gjak ne fytyre. Eshte sa une ai djali, ne vit te 2. Nuk i mbajm telefonat na i mbledhin po kan hapur kamerat. Nuk i dime arsyet akoma, po meren mesuesit me polict. Po shum keq jan zon pz”
