Detaje të reja tronditëse vijojnë të dalin në dritë nga vrasja e Anesti Ramës nga vajza e tij Ermalinda Rama 26 vjeç. Kjo e fundit është ndihmuar nga e ëma, Valbona Rama për të fshehur krimin duke tentuar ta trajtonin si ngjarje aksidentale.
Mirëpo ditën e sotme, policia njoftoi arrestimin e një personi të tretë i dyshuar si bashkëpunëtor i 26-vjeçares, Çlirim Dogani 55 vjeç.
Sipas burimeve për media, Çlirim Dogani është partneri i Ermalinda Ramës, gjithashtu i martuar me një tjetër person dhe baba i një fëmije në moshë madhore. Ndërkohë Ermalinda më herët ka qenë e fejuar 3 herë, marrëdhënie për të cilat babai i saj nuk ka qenë dakord.
Një tjetër pistë që po hetohet si shkak i mbytjes me tel të Anesti Ramës nga e bija, gruaja dhe partneri i vajzës, mund të jetë fakti se viktima nuk ka qenë dakord për lidhjen e Ermalindës me 55-vjeçarin.
Ndërkohë Çlirim Dogani në dëshminë e dhënë përpara autoriteteve, ka mohuar të ketë marrë pjesë në krim duke thënë se mbrëmjen e ngjarjes ka qenë larg fshatit Frashër, ku dhe ka ndodhur krimi.
Çlirim Dogani jeton në Roskovec, aty ku dhe mendohet se është njohur me 26-vjeçares pasi motra e Ermalindës është e martuar në këtë zonë. 55-vjeçari punon si shofer i linjës urbane të zonës, vend ku dhe ka nisur njohja mes tij dhe 26-vjeçares.
Anesti Rama ka gjetur vdekjen pasi është mbytur me tel. Gjithashtu autopsia tregoi se viktima ishte masakruar me mjet prerës dhe në pjesët intime. Ermalinda Rama ka pranuar krimin në polici duke deklaruar se babai nuk e lejonte që të jetonte e lirë, të vishej, të dilte me shoqet e madje as nuk i jepte para.
Në ngjarje mësohet të jetë përfshirë dhe gruaja e viktimës, Valbona Rama, e cila ka ndihmuar vajzën e saj në fshehjen e gjurmëve të krimit.
