Një 39-vjeçar është shpallur në kërkim nga policia e Tiranës, pasi ka kryer manovra të rrezikshme me mjetin e tij në rrugën “Halit Haxhija”.
Blutë e kryeqytetit bëjnë me dije se ky shtetas ka përplasur me automjetin e tij 5 këmbësorë, të cilët po lëviznin në trotuar. Këta të fundit kanë kryer ekzaminimet mjekësore dhe më pas janë kthyer në banesë.
Sipas njoftimit, 39-vjeçari ka braktisur automjetin e tij dhe është larguar nga vendngjarja, ndërsa po punohet për kapjen e tij.
“Shpallët në kërkim shtetasin P. B., 39 vjeç, pasi në rrugën “Halit Haxhija” dyshohet se, duke kryer manovra të rrezikshme me automjet, automjeti ka dalë nga rruga duke përplasur lehtë 5 shtetas (këmbësorë), të cilët po lëviznin në trotuar, dhe më pas është larguar duke braktisur automjetin. Të dëmtuarit, pas kryerjes së ekzaminimeve mjekësore, janë larguar për në banesë. Punohet për kapjen e tij dhe dokumentimin e plotë të rrethanave të rastit.”, njoftoi policia.
