Banorja e “Ferma Vip” Elinara Shehu ka ndarë me publikun një pjesë nga jeta e saj, një ngjarje të rëndë që ka lënë shenjë tek vetë ajo edhe në ditët e sotme.
Ngjarja traumatike e Elinarës daton në kohën kur ajo ishte një adoleshente teksa ishte në përpjekje për të fituar pavarësinë ekonomike nga familja e saj.
Këngëtarja tregon se një ditë teksa ishte nisur për në punë, një komshi u ofrua ta shoqëronte për në punë me makinë së bashku me një mikun e tij.
Teksa shprehet se nuk kishte përse ta refuzonte nisur nga fakti që njiheshin prej kohësh dhe përshëndeteshin gjithmonë, Elinara tregon sesi ka mundur t’i shpëtojë asaj situate të frikshme pasi qëllimet e tyre ishin krejt ndryshe nga çfarë ajo mund të kishte imagjinuar.
“Gjatë pushimeve të verës, doja të isha e pavarur nga prindërit. Fillova punë në një butik. Një ditë po prisja autobusin për në punë dhe një komshi më ofroi të më çonte me një mikun e tij. E njihja, përshëndeteshim çdo ditë nuk kisha pse mos ta besoja.
Makina mori një drejtim tjetër nga ai i qendrës, dhe shpejt situata u bë e frikshme. Shoferi kishte një vështrim të egër. U ktheva dhe pashë komshiun tim, ai më bëri shenjë me gisht ‘shttt’. Më kërcënuan: ‘Do të të vrasim.’ Në atë moment e kuptova që duhej të veproja.
Hapa siguresën e makinës dhe u hodha nga makina në lëvizje. Rashë në rrugë pa ndjenja. Gjunjët, bërrylat, gishtat, ishin të gjithë të gjakosur. Por gjesti që bëra më shpëtoi jetën. Më mirë të humbja jetën, sesa të bija në duart e tyre”, është shprehur Elinara Shehu.
