Sot i jepet lamtumira e fundit një prej figurave më të njohura të jetës publike shqiptare, publicistit dhe intelektualit Artan Lame i cili u nda nga jeta disa ditë më parë në mënyrë të parakohshme në moshën 58-vjeçare.
Ceremonia e homazheve në nderim të tij do të zhvillohet pranë Akademisë së Shkencave, nga ora 10:00 deri në orën 12:00, ku familjarë, miq, kolegë dhe qytetarë do të kenë mundësi t’i bëjnë nderimet e fundit njeriut që për dekada kontribuoi në fushën e historisë, publicistikës dhe administratës publike.
Po sot, Artan Lame do të përcillet për në banesën e fundit, në varrezat e Sharrës në Tiranë.
Artan Lame ndërroi jetë në një spital në Gjermani, pas një ndërhyrjeje të vështirë kirurgjikale në zemër, të cilën nuk arriti ta përballojë.
Lame ishte një emër i njohur për publikun shqiptar si publicist, opinionist dhe studiues i pasionuar i historisë kombëtare. Ai ishte edhe koleksionist i një pasurie të rrallë me artefakte historike, si dhe një aktivist i palodhur për mbrojtjen e trashëgimisë kulturore të vendit.
Karriera e tij në administratën publike nisi si Drejtor i Trashëgimisë Kulturore në Ministrinë e Kulturës, për të vijuar si nënkryetar i Bashkisë së Tiranës gjatë viteve 2000-2002. Nga viti 2013 deri në largimin e tij nga jeta në vitin 2023, ai drejtoi institucionet e legalizimeve dhe më pas Kadastrën, duke lënë gjurmë në një nga proceset më të ndërlikuara të administrimit të pronësisë në vend.
