Shqipëria elektrizoi skenën e Eurovision-it me performancën unike të “Zjarm” nga Shkodra Elektronike, duke siguruar një vend të merituar në finalen e madhe të këtij eventi prestigjioz europian.
Mes urimeve të shumta, ka ardhur edhe një reagim i veçantë nga Luiz Ejlli, fitues i Big Brother VIP dhe vetë përfaqësues i dikurshëm i Shqipërisë në Eurovision.
Me një mesazh emocional në rrjetet sociale, Luizi shprehu jo vetëm krenarinë për kualifikimin, por edhe thellësinë kulturore të suksesit të arritur:
“Sonte nuk u kualifikua thjesht një këngë, u kualifikua një rrënjë. Një brez i tërë që është rritur mes melodive të së kaluarës dhe tingujve të së ardhmes.
Shkodra Elektronike nuk zgjodhi rrugën e lehtë, zgjodhi të jetë ndryshe, të jetë vetvetja. Dhe Europa u ngrit në këmbë.
E ndjej këtë jo si sukses, por si thirrje: T’i besojmë më shumë vetes sonë, gjuhës, tingullit dhe rrënjëve tona. Kur muzika është e sinqertë, ajo nuk ka nevojë për përkthim.
Shkodra Elektronike s’e ktheu vetëm traditën në muzikë, e bëri krenari kombëtare. Finalja është vetëm fillimi.
Shkodra foli! Europa dëgjoi!”
Tani të gjithë sytë janë drejt finales, ku “Zjarm” do të përfaqësojë jo vetëm një këngë, por një histori, një brez, një komb.
