Aktori Olsi Bylyku ishte i ftuari i radhës në emisionin “The Dalina Show”, ku foli hapur për eksperiencën e tij në Big Brother VIP.
Siç ndodh gjithmonë, Olsi nuk la asgjë pa thënë dhe bëri disa deklarata që kanë ngjallur kuriozitet të madh.
Një nga çështjet më të diskutuara ishte fakti që ai nuk është futur asnjëherë në dhomën e rrëfimit gjatë qëndrimit të tij në shtëpi.
“Nëse nuk e dini, atje ka një dhomë ku mund të diskutosh çdo gjë,” tha ai, duke shpjeguar se hyrja në këtë dhomë bëhet vetëm kur të thërret produksioni. Epo, mesa duket, thirrja për të nuk erdhi kurrë.
Sipas tij, kjo mund të ketë ndodhur për shkak të një “hatërmbetjeje” nga produksioni, edhe pse ai vetë nuk e di arsyen. “Nuk jam natyrë që nuk bashkëpunoj,” theksoi Olsi, duke shtuar se edhe mënyra e eliminimit të tij nga loja nuk i është dukur e drejtë.
Por, në stilin e tij të zakonshëm, Olsi nuk e la mënjanë humorin. Ai tha se, nëse do të qëndronte më gjatë, ndoshta do të kishte krijuar edhe një lidhje brenda shtëpisë. “Po sikur të ndodhte kjo, mos vallë do të më martonin?” – shtoi ai me shaka.
Ndonëse eksperienca e tij në BBV nuk shkoi siç e kishte imagjinuar, Olsi la të kuptohet se ka ende shumë për të treguar.
